व्यवसायिक ऐक्यबद्धता तथा रचनात्मक समाधानका लागि हाम्रो अपिल

व्यवसायिक ऐक्यबद्धता तथा रचनात्मक समाधानका लागि हाम्रो अपिल

रुपन्देहीको तिलोत्तमा नगरपालिकाबाट उत्पन्न भएको वर्तमान असहज परिस्थितिले रुपन्देहीका औषधि व्यवसायी तथा समग्र औषधि क्षेत्रलाई पीडा दिइरहँदा रुपन्देहीसँगै हाम्रो पनि मुटु दुखेको छ, पीडाबोध भएको छ।

समाजले सम्मानपूर्वक हेर्दै आएको निकायका प्रतिनिधि एवम् समाजको कवचका रूपमा रहनुभएका जिम्मेवार व्यक्तिहरूबाटै रुपन्देहीका मर्यादित औषधि व्यवसायीप्रति लक्षित गरी गरिएको अमर्यादित तथा अमानवीय प्रस्तुतिप्रति हामी गम्भीर खेद व्यक्त गर्दछौं।

देशको स्वास्थ्य प्रणालीको महत्वपूर्ण आधारस्तम्भका रूपमा रहेको औषधि व्यवसाय र यससँग प्रत्यक्ष रूपमा जोडिएका व्यवसायी तथा पेशाकर्मीप्रति उत्पन्न हुने कुनै पनि चुनौतीप्रति हामी गम्भीर, संवेदनशील र जिम्मेवार छौं। यसै सन्दर्भमा, बिना प्रमाण र आधार भावावेशमा गरिएका आरोप तथा अमर्यादित अभिव्यक्तिप्रति नेपाल औषधि व्यवसायी संघ, काठमाडौं जिल्ला शाखाको गम्भीर ध्यानाकर्षण भएको छ।

यस कठिन परिस्थितिमा रुपन्देही जिल्ला शाखाले अघि सारेका हरेक सकारात्मक, न्यायोचित र रचनात्मक पहलप्रति हाम्रो सदैव साथ, सहयोग र ऐक्यबद्धता रहनेछ।

संघमा आबद्ध सदस्यहरूको संरक्षण र सम्मानका लागि आवाज उठाउँदै गर्दा नेतृत्व वर्गले भोग्नुपरेको मानसिक तनाव र कठिनाइलाई हामीले नजिकबाट अनुभूति गरेका छौं। त्यस्तो अवस्थामा बोल्नुपर्नेहरूले बोल्ने साहस नगर्दा र साथ दिनुपर्नेहरू मौन रहँदा हाम्रो मन अझ बढी दुखेको छ।

हो, हाम्रो मुटु दुख्यो। त्यही मुटुको पीडाले हामीलाई जगायो। हामी जाग्यौं, आवाज उठायौं।

तर अझै सबै एकैपटक, समान रूपमा र पर्याप्त स्फूर्तिका साथ जागिसकेका छैनौं। हामीलाई विश्वास छ, जब हामी साँच्चिकै जाग्नेछौं, जब हामी व्यक्तिगत सीमाभन्दा माथि उठेर एकताबद्ध भएर उभिनेछौं, तब कुनै पनि चुनौती हामीभन्दा ठूलो रहने छैन।

तर हामी स्पष्ट रूपमा विश्वास गर्दछौं, संघर्षको अर्थ टकराव मात्र होइन। संघर्षको सबैभन्दा सुन्दर परिणाम समाधान हो।

त्यसैले हाम्रो उद्देश्य कसैलाई कमजोर बनाउनु, कसैप्रति आरोप लगाउनु वा असहज परिस्थिति सिर्जना गर्नु होइन। हाम्रो उद्देश्य समस्या जहाँबाट उत्पन्न भएको भए पनि त्यसको सम्मानजनक, न्यायोचित, व्यवहारिक र दीर्घकालीन समाधान खोज्नु हो।

हामी सबैले बुझ्नैपर्छ, औषधि व्यवसाय केवल व्यापारिक गतिविधि मात्र होइन। यो जनस्वास्थ्यसँग प्रत्यक्ष रूपमा जोडिएको अत्यन्त संवेदनशील र जिम्मेवार क्षेत्र हो। यस क्षेत्रमा उत्पन्न हुने सानो असमझदारी, अन्योल वा चुनौतीले व्यवसायीलाई मात्र होइन, अन्ततः औषधिको सहज उपलब्धता र आम नागरिकको स्वास्थ्य सेवामा समेत प्रभाव पार्न सक्छ। त्यसैले यस्ता विषयलाई समयमै गम्भीरतापूर्वक सम्बोधन गर्नु आवश्यक छ।

यसर्थ, सम्मानित तिलोत्तमा नगरपालिका स्थानीय सरकारका रूपमा जनस्वास्थ्य तथा स्थानीय व्यवसायको संरक्षण र प्रवर्द्धनमा महत्वपूर्ण भूमिका निर्वाह गरिरहेको संस्था हो। हामी नगरपालिकाको संवैधानिक, कानुनी तथा सामाजिक भूमिकाप्रति पूर्ण सम्मान व्यक्त गर्दछौं।

साथै, वर्तमान परिस्थितिलाई समस्या र पक्ष-विपक्षको दृष्टिले मात्र नभई समाधान खोज्ने एउटा अवसरका रूपमा ग्रहण गर्न हार्दिक अनुरोध गर्दछौं।

हाम्रो उद्देश्य कुनै निकाय वा स्थानीय सरकारप्रति अविश्वास सिर्जना गर्नु होइन। स्थानीय सरकारको अधिकार, भूमिका र सामाजिक उत्तरदायित्वप्रति हाम्रो पूर्ण सम्मान छ। औषधि व्यवसायी र स्थानीय सरकारबीचको सम्बन्ध टकरावको होइन, सहकार्य, सहअस्तित्व र जनस्वास्थ्यप्रतिको साझा जिम्मेवारीको सम्बन्ध हो भन्ने हाम्रो दृढ विश्वास छ।

त्यसैले सम्मानित तिलोत्तमा नगरपालिकालाई वर्तमान परिस्थितिलाई संवाद, सहकार्य र सकारात्मक दृष्टिकोणबाट पुनः मूल्याङ्कन गरी सम्बन्धित पक्षसँग आवश्यक समन्वय गर्दै समाधानमुखी, न्यायोचित र व्यवसायमैत्री निकासका लागि रचनात्मक पहल गर्न हार्दिक अनुरोध गर्दछौं।

त्यसैगरी, औषधि व्यवस्था विभाग (DDA) बाट पनि यस विषयमा सकारात्मक, निष्पक्ष तथा समन्वयकारी भूमिका निर्वाह हुने अपेक्षा राख्दछौं। नियामक निकायको भूमिका केवल नियमन र कारबाहीमा सीमित नरही आवश्यक अवस्थामा सम्बन्धित पक्षबीच संवाद, सहजीकरण तथा स्पष्ट कानुनी मार्गनिर्देशनमार्फत समस्या समाधानमा योगदान पुर्‍याउनु पनि हो।

त्यसैले वर्तमान विषयलाई पनि संवाद, सहकार्य र समन्वयको माध्यमबाट समाधानतर्फ अघि बढाउन औषधि व्यवस्था विभागको सकारात्मक र रचनात्मक सहजीकरण रहनेछ भन्ने हाम्रो विश्वास छ।

औषधिको क्षेत्रमा देखापर्न थालेको यस्तो प्रवृत्तिलाई समयमै सम्बोधन गर्न नसकिए यसले भविष्यमा एउटा “Silent Pandemic” को स्वरूप लिन सक्ने हाम्रो गम्भीर चिन्ता छ। आज एउटा ठाउँमा देखिएको समस्या भोलि अर्को ठाउँमा नदोहोरियोस् भन्ने हाम्रो साझा सरोकार हो।

त्यसैले यस विषयलाई कसैको व्यक्तिगत वा स्थानीय समस्याका रूपमा मात्र नहेरी औषधि क्षेत्रको मर्यादा, व्यवसायको सुरक्षा र जनस्वास्थ्यको हितसँग जोडिएको साझा विषयका रूपमा लिन आवश्यक छ।

अन्त्यमा, हामी रुपन्देहीका साथीहरूको पीडामा केवल सहानुभूति व्यक्त गरेर बस्ने पक्षमा छैनौं। उहाँहरूको न्यायोचित र सम्मानजनक आवाजसँगै उभिँदै, हरेक सकारात्मक, न्यायोचित तथा रचनात्मक पहलमा हाम्रो साथ, सहयोग र ऐक्यबद्धता निरन्तर रहनेछ।

र हामी स्पष्ट रूपमा भन्दछौं:

आजको आवश्यकता आक्रोश होइन, एकता हो। आजको आवश्यकता आरोप होइन, संवाद हो। आजको आवश्यकता विभाजन होइन, साझा पहल हो। आजको आवश्यकता टकराव होइन, सम्मानजनक समाधान हो।

एकता हाम्रो शक्ति हो। संवाद हाम्रो बाटो हो। समाधान हाम्रो लक्ष्य हो।

धन्यवाद! . शुभ मान श्रेष्ठ शंकर महर्जन . महासचिव अध्यक्ष . नेपाल औषधि व्यवसायी संघ, काठमाडौँ जिल्ला शाखा